Narcose de nitróxeno

Hai lugares por onde paso en apnea: o refuxio pestilente dos gatos da rúa -alimentados coas sobras do domingo mais sen dereito a pousada- e onda ti.

Dobrégate o vento do norte non llo permitas érguete axiña ao son do astro gaiteiro. Érguete insubmisa sorrille a Lourenzo para que deite en ti cada tarde a súa dondura morna.

Nai fecunda útero primixenio agardas a semente coma promesa etérea.

Xa hai un tempo que practico mergullo deportivo nas augas do sentimento. Poño o traxe de neopreno e somérxome en apnea.  Unhas veces quedo máis na tona. Outras, descendo moitas vidas e chego ao leito, ao máis fondo do útero da Nai. Esas veces, nas que emprego botella de ar comprimido, esas veces padezo estrañas sensacións. Son efectos secundarios, din por aí, do mergullo de profundidades.